Warning: include(blocks/googl_analytics.php): failed to open stream: No such file or directory in /home/kamjl20171/chirkhata.ru/docs/view_post.php on line 36

Warning: include(): Failed opening 'blocks/googl_analytics.php' for inclusion (include_path='.:/home/kamjl20171/chirkhata.ru/php') in /home/kamjl20171/chirkhata.ru/docs/view_post.php on line 36

Билараб рокьи

Тема: Дагъистанальул Альпаби

Хъвараб къо:  2012-02-01 Автор:  Ибрагим Ибрагимов Балагьана:  1222

 

Гьаб иш ккана 1972 соналъул риидал. Дун вукIана МахIачхъалаялда пединституталъул математикаялъул факультеталъул кIиабилеб курсалъул студент. Риидалил сессиялъул экзаменазул заман букIана гьеб. Ингилис мацIалъул экзамен кьолев вуго дун. Школалда цIалулеб заманалъго анищ букIана дир батIиял улкабазул мацIал лъазаризе. Ва гьале институталде цIализе лъугьарабго тIоцебесеб курсалдаго дир анищ тIубаялде бугеб гъираялъ, дица тIаса бищана ингилис мацI. Амма гIемерисел дир сихIирал курсцояз иностранный мацIалъул бакIалда тIаса бищана гIурус мацI.

МацI лъазабиялда шавкъалда тIаделъана дун: босана гьеб мацI лъазабизе кумек гьабулел граммпластинкаби, проигрыватель, кинабго эркенаб заман лингвистикаялъе кьолаан дица. Ва гьеб хIалтIуца хIасилалги лъикIал кьуна. МацIалъул мугIалим лъикIай педагог ва психолог гурейги, хIеренаб каламалъул, хIикматго чиясул рекIелъе йортулей, гIажаибаб берцинлъиялъул гIадан йикIана, гIелалъги дир кьерилай йикIун ятила гьей Изиева Рауля Абдуллаевна. Дир мацI лъазабиялде бугеб гъира-шавкъ гьелда бихьана, гьелъ цIакъ веццулаан дун ва кидаго тIадегIанал къиматалги лъолаан дие. ГIумруялъул 25 сон барав дие лъади ячине замана щун букIана, лъадилъун ийкIиней гIадай гIадамалъул пикрабазда вугев дица гIемер хиял гьабулаан Раулял. Дир гьелъухъ рокьи ккун букIун батила. Амма гьелда хIал лъараб щибниги жо дица гьабичIо, гьелда дир рекIада бугеб хIал лъалеб букIарабищ букIинчIебищ дида лъаларо. Дир рекIел балъголъи дица лъиего рагьичIо. Раулял хIакъалъулъ дида лъалеб жоги дагьаб букIана.  Гьей росасда йигищ гьечIищалигицин лъалароан дида.

Гьоркьо-гьоркьоб Рауля Абдуллаевна диде семулаан дица дунго школалда ингилис мацI малъичIеб къокъаялда гъорлъ хъвазавунин абун. Гьелда ракIалде кколеб букIун буго диего бигьалъи балагьулев дица школалдаго мацI малъарав чи вугониги цIи малъулезда гъорлъ хъвазавунин дунгоян. Гьеб букIана тIоцебесеб курсалдаго. ЦIали цебехун анагIан байбихьана захIматал гIелмаби лъазаризе, цояб гъваридго лъазегIан течIого тIаде дагьабги захIматаб бачIунаан: матанализ, высшая алгебра, аналитикияб геометрия-дун ингилис мацIалде регIизего течIо гьел дир махщалие цIакъго аслияллъун кколел гIелмабаз. Квеш-лъикI кIиго курс лъугIулеб буго, ингилис мацIги тIокIаб малъуларо, ва гьаб сессиялда щвараб къимат дипломалде уна. Экзаменазде дун кидаго лъикI хIадурулаан ва жанивеги тIоцеве унаан, амма гьаб экзаменалде дир хIадурлъи загIипаб букIана ва дун жаниве ана ахиралда. Свакарай мугIалималда дир рекIеда бугеб хIинкъиялъул асар бихьичIин ккола дида. Гьелъ ингилис мацIалда хъвараб цо гьитIинабго тIехь дида цебе хъурщана. Гьениса цо хабар дида бихьизабуна ва чIалгIараб гьаркьидалъун, дидехун берго реххичIого «транслейт»-ан абуна. Гьеб букIана Джон Голсоурсил «Чак-чак» абураб хабар, дида гIумруялъ кIоченаро гьеб. Дица словаралъул кумекалдалъун щибаб рагIи гIурусалдеги буссинабун предложение гIуцIцIизе хIал бихьана, амма кинго цоцада рухьинарун магIна рекъезабизе кIоларел рагIабазул гохI гуреб жо дир лъугьинчIо. Кибго сихIкъотIи… Боржунеб тIотIол гьаракь рагIулеб хIал …

Киналго тIагIана. Коридоралъуб хIатIил сасго рагIулеб гьечIо. Классалдаго гIицIго Рауляги дарман тIагIарав студент-дунги гурони чи гьечIо. Ахирги гьеб балагьаб сихIкъотIи хIехьезе кIвечIев дица абуна: «Рауля Абдуллаевна! Изну кье дие гьаб тIехьги босун рокъове ине. Дун метералде хабарги гIурусалде буссинабун вачIина.» Гьей разилъана. Дун университеталде гIедегIана. Гьениб инфакалдаса цониги студентги валагьун кумек щвеялде хьул букIана дир. Амма гьел киналго помидор бакIаризе колхозазде ун ратана. Гьебго жо ккана дирго институталдаги. Щиб гьабилеб?!

Гьедин ана къо. Ургъалабазда рогьана рахIат гьечIеб сордо. Радал дида ракIалде щвана дир росуцояв ва школалда дунгун цо класалда цIалулев вукIарав ГIалисултанов Эсенбулат дол соназ хIалтIулев вукIана пединституталъул  инфакалъул лингофонный кабинеталъул кIудияв лаборантлъун. Вилъана дун гьесухъе кумек гьарун ва бицана дирго хIажат. Эс дун вачана кабинеталъул заведующиясухъе ва гьесда гьарана дие кумек гьабеян. Кабинеталъул заведующий вукIана Яша абун жугьутIав, фамилия дида ракIалда гьечIо. Гьесги абуна инфакалъул киналго студентал ва преподавателал овощал ракIаризе колхозазде ун ругин ва дие кумек щвей щакаб жо бугин. Гъанкъулеб буго дир лъаялъул гама …

Ингилис мацIалъе кIийилаб къиматги щун дун пединституталдаса нахъе реххи хIакъикъатлъун лъугьинехъин буго. ЦинтIаго Яша цо кинабалиго пикруялъ чIаголъун вачIана. Факультетазда гьоркьой хIалтIулей цо преподаватель йигин гьаниян абуна Яшаца, гьелъ дир переводги хIадурилебин абун босун ана тIехь. Гьелъухъ дица жиндиеги Эдикиеги коньякалъул шиша, преподавателалъе 2-3 къоно шоколадалъул босизе рекъараб букIинин абуна жугьутIас. Сессиялъул лъугIулеб ва росулъе тIадвуссине заман щолеб букIун дихъ гIарац дагьлъун букIана, амма чара щиб, сайгъат босичIого дун ворчIиларо. Дозухъ Изиевалъул тIехьги тун, дун тукаде векерана. Босана гьениса къваригIанщинаб, кьуна Яшахъе ва гьикъана перевод кин унеб бугебан. Ниж лингофонный кабинеталъул нахъа рокъор рукIана. Аз дида гьитIинаб гордухъан йихьизаюна нижеде мугъ кьун классалда гIодокIарай дир переводалда тIад хIалтIулей гIадан. Экзамен байбихьизе заман гIагарлъулеб букIана, дица Яшаде абуна перевод ахиралде щвезегIан дие заман гьечIин лъугIичIониги кIваричIин, гьабурабниги переводги тIехьги дихъе кьеян гьарейин гъой переводчицаялдаян. Берцинаб хатIалъ хъвараб тIамачги тIехьги босун вачIарав Яшаца гъойги йигин киеялиго гIедегIунин абуна дида.

Яшаца кьураб жоги босун аудиториялде векерана дун ва дир рекIелъ цIа бакарай мугIалималъухъ балагьун чIана. КватIичIого тIаде щварай Рауля дие цо хIикматго гьимана ва дир ургьимес гьалдезе лъугьана.
Дица гьеб гьими тана дир рокьи бичIчIарай гьелъ дие кьолеб разилъилъун. Дица байбихьана цо тIехьалдасан, цо тIамчидасан предложениял цIалун перевод гьабизе. Гьеб куцалда дица 7-8 предложение цIаларабго Рауля Абдуллаевналъ цо сихIирго гьамулаго цIакъ лъикI бугин абуна, ва дида гьарана  ахирисеб лъабго предложениялъул магIна гьабеян.
Вай БетIергьан Аллагь! Гьалде бицинеб щиб?! Дица байбихьана цо батIи-батIиял жал рицине… «Рауля Абдуллаевна! Дун рогьинегIан кьижичин абизе бегьула перевод гьабулев вукIун, амма кинго ахирадле щвезабизе кIвечIо …»

Долъ абулеб буго:  «Ибрагьим! Мун цIакъ хирияв студент вукIана дие. Дуде божи ва рокьи букIана дир дур хIаракат ва дир дарсиде бугеб рокьи бихьун.
Амма дида киданиги ракIалде кколароан мун гьедин гьереси бицунев чи ватилин. Дир квералъ хъавараб жо диего цIалулев дуца бицунеб жо щиб?!
Ва цойги. Киданиги кколароан дида ракIалде мун жугьутIав ватилин! ЖугьутIазулги Ибрагьимин цIарищ букIунеб?!». Дица гьелда абулеб буго дун жугьутIав гурин, магIарулав вугин. Амма цо гьереси тIатарав дида гьей божилищ? Яшацаги гьелда абун букIараб куц буго цо жиндир гIагарав чиясе кумек гьабеян. Дида кинго кIвечIо дун жугьутIав вукIиналда ракI чIчIарай гьелъул пикру хисизабизе.
Гьей лъадилъун ячиналде букIараб дир анищ гьеб бакIалда хIорлъана.
Рокьи къиматалъухъ хисана дица. Рауляца дида абуна цебе букIараб хIаракатги, нижер цоцадехун букIараб хиралъиги, къимат дипломалде унеб букIинги хIисабалде босун дие «4» къимат лъолеб бугин.

ЛъикIаб къиматалъ воххизейищ гьавурав дун?
Яги билараб рокьиялъ къварилъизейищ гьавурав?
Дида жакъаги гьелъие жаваб кьезе кIоларо …

Гьаб гьумералъул хIакъалъулъ гIадамазул пикру

Жиндирго пикру хъварав (ай):   Барият
Къо-моцI:  2012-02-27
Неужели она не догадалась о Ваших чувствах?
Жиндирго пикру хъварав (ай):   муххамад
Къо-моцI:  2012-03-09
я чикатинец и чирката мой край родной я горжусь этим

Дурго пикру хъвай: